Partondion na Mulak

Pamuhai Adong do umpasa Batak na mandok songon on, “Seang do tarup ijuk soada langge panoloti, seang do sipaingot so adong na mangoloi” Dua ma astuan ni umpasa on. Parjolo, sipaingot. Di halak Batak, sipaingot ima poda asa unang sanga tarrobung sada halak tu lombang na parohon jea. Asing ni i, sipaingot ima sosososo, molo dung sanga tarrobung, asa diingot mulak. Paduahon, hamubaon. Mansai bagas do diondolhon di habatahon taringot tu hamubaon. Boi do patudoson hamubaon dohot haimbaruon laho manggombarhon pangalaho ni sada halak na ingot mulak tu ojahan ni ngolu na hot dohot na polin. Molo dung sanga tarsilandit manang tarrobung, diingot ma muse mulak tu bona, ima ojahan ni ngolu na hot dohot na polin i. Aha do astuan ni umpasa on molo pinadomu tu Barita na Uli na sian Jahowa? Adong do sada ende na jotjot diendehon punguan ma, margoar: “Jesus Parmahan” Di ende i, targurit do pandohan na mandok: “Jesus parmahan, sai mardalani, laho mandiori na mago I. Sai digorai do mandatdati, ro ma ho mulak tu lambungHi. Mulak ma ho, ihuthon Jesus. Ai ndang tingkos be dalanmi. Pingkiranmi, hatop pauba, siludaponhon Jesus i” Mansai lambok do begeon ende i, ima manggobarhon hadirion ni Jahowa, na sai tarpaima di hamubaon dohot haimbaruon ni hita halak na hinaholongan ni rohaNa. Dibahen Jahowa do poda dohot hata laho manggora ganup halak tu hamubaon anggiat mulak muse tu lambung-Na. Molo dung muba do sada halak, mansai las situtu ma roha-Na manjanghonsa. Hadirion ni Jahowa na songon i do na digombarhon turpuk di ari Minggu na dienet sian Lukas 15:11-32. Laos i muse diondolhon turpuk partangiangan na naeng pabagasonta di ombas on. Turpuk on, ima hata ni Jahowa na disuriranghon panurirang Jeremia tu bangso Juda, sian uju digomgomi raja Josia bangso Juda, sahat tu na ro bangso Babel mangaragehon Jerusalem, laos gabe tartaban ma bangso i di tano Babel. Andorang so ro tartaban di Babel nasida, nunga dipaingot Jahowa marhitehite panurirang Jeremia, anggiat ma mulak nasida tu Jahowa. Tardok ma turpuk on sipaingot sian Jahowa marhitehite panurirang Jeremia tu halak Juda. Di turpuk on, diarahon do halak Juda i, asa mangulahon partondion na mulak. Marhitehite partondion na mulak, gabe habangsa ni Jahowa ma parngoluon ni bangsa i. Aha do lapatan ni na mulak? Adong do hata ni Debata na jotjot tajahahon jala dibahen GKPI do i Bagabaga Hasesaan ni Dosa di Agenda, na mandok: “Songon sintongna mangolu ahu, ninna Tuhan Jahowa, tung na so lomo do rohangku mida hamatean ni halak parjahat i, so ingkon mida hamumulak ni parjahat i tumadingkon dalanna i nian, asa mangolu ibana. Antong sai mulak ma hamu tumadingkon dalanmuna angka na jahat i! Boasa tung tagonan mate hamu, ala pinompar ni Israel?” (Hez. 33:11). Ondolan na boi putihon ima, mulak. Jala molo taenet muse sian Lukas 10:11-32 (jamita Minggu), tong do ondolan na sarupa berengon, ima mulak. Ondolan i muse do pe na boi berengon di bagasan turpuk on, “Sai mulak ma, hamu ale angka anak na marbalik, ninna Jahowa…” (ayat 14). Alani, mansai ringkot do molo tapabagas lapatan ni pandohan hata mulak ondeng. Didok halak na malo do, pogu ni panjanghonon ni Debata tu angka pardosa marondolan di pandohan "mulak". Alai, marojahan tu turpuk sadari on, dang tarsirang hita pandohan "mulak" dohot na asingnari di ayat 14 i, ima "marbalik". Asa anggiat dasip pangantusionta, mansai uli do molo dua pandohan ondeng, "mulak" dohot "marbalik", rap tapabagas hombar tu astuanna di hata Heber. Parjolo, hata "mulak" diputik sian hata Heber, שׁ֣וּבוּ (shûvû). Asa mura hita mangantusi astuan ni pandohan i, binahen ma jolo tudosan. Isarana, molo naeng laho hita tu Jalan Pintu Air sian Jalan Air Bersih, ingkon mardalan do hita dompak Amplas. Alai, dung sahat hita di Simpang Limun, ingkon "mulak" do hita muse tu pudi. Molo tatorushon dalanta dompak Amplas, lupa "mulak" tu pudi, olo ma hita gabe lilu. Asa sahat hita tu situjuon, unang lupa "mulak" muse. Ido astuan ni shûvû ondeng, manang digurithon ma i di bahasa Toba, mulak. Hombar tu hatorangan i, boi ma bahenon astuan ni hata "mulak". "Mulak" ima uju mansohot sada halak sian dalan manang ngolu na mambahen ibana dao sian bona ni parngoluon, ima Jahowa, jala manigor sigop humusor mardompakhon Jahowa jala mardalan manopot Ibana. Paduahon, pandohan "mulak" somalna dipasahat tu halak na "marbalik". Sian hata Heber do pandohan "marbalik" on diputik, ima שׁוֹבָבִים֙ (shovavim). Astuanna, halak naung manimbil sian dalan na tingkos. Dipangke panurirang Jeremia pandohan "shovavim" laho pataridahon hajugulon ni bangso Juda. Nang pe naung diboto bangso i, naung pilit do langkanasida, alai tong do pe didalani nasida dalan na pilit ini. Ala mardompakhon dalan na pilit i do dibolus bangso i, didok panurirang Jeremia ma nasida halak manang bangso shovavim (bhs. Indonesia: Murtad). Nang pe halak na jogal bangso Juda, ndang na gabe manginona hajugulon ni bangso i tu Jahowa. Tong do hot hadirion ni Jahowa maradophon bangso Juda. Ndang na gabe muruk Jahowa, alai lambok do Ibana paingothon bangso Juda, “Sai mulak ma hamu…” Dipataridahon Jahowa do hadirion-Na na marasing sian hadirion ni bangso Juda. Molo bangso Juda, ima halak na jugul; alai dang gabe manginona hajugulon ni bangso Juda tu Jahowa asa gabe Debata na jugul Ibana. Alai, maradophon hajugulon i, dipaingot Debata do bangso Juda i asa olo mulak; asa unang ditustus nasida dalan na mardompakhon hamagoan. Alai asa mulak nasida muse tu na hot jalan na polin i, ima Jahowa. Gabe Habangsa ni Jahowa Hata "habangsa" di ayat 17 i, diputik do sian pandohan di hata Heber, כִּסֵּ֣א (kisseʼ). Marhadomuan do "habangsa" dohot "harajaon". Molo di hasomalan ni halak Juda, digoari ma "habangsa" inganan ni sahalak Raja. Jala "habangsa" i sandiri patuduhon hasangapon dohot huaso ni sahalak raja. Dipangke panurirang Jeremia ma pandohan "habangsa" on laho pataridahon hadirion ni bangso Juda na imbaru dung mulak nasida tu Jahowa. Di parmulak ni bangso i tu Jahowa, gabe sangap ni Jahowa ma na patar di bagasan nasida; gabe inganan harajaon ni Jahowa ma ngolu ni bangso i. Habangsa ni Jahowa dang holan di sada inganan sambing be, alai ganup disi mian bangso i, disi ma mian sangap ni Jahowa. On ma hadirion ni bangso Juda na imbaru, dung mulak nasida tu bona hangoluan na hot jala na polin, ima Jahowa. Sipasahaton di Jamita Parjolo, turpuk on paingothon, hadirion ni ganup angka na porsea ima, hadirion na mulak. On ma na ginoaran: "Partondion na mulak". "Partondion na mulak" ima hagiot laho mangauhon ganup dalan siboluson dohot angka naung binolus. Molo gabe padaohon diri do dalan i sian Jahowa, gira ma mulak tu ampuan ni Jahowa. Paduahon, hadirionta na polin dang ditontuhon portibi on. Hadirionta ditontuhon Jahowa do. Ala Jahowa do manontuhon hadirionta, sude gulmit ni parngoluonta ingkon do gabe parmianan habangsa ni Jahowa. Dohot hata na asing, ngolunta on ingkot parhitean sangap di Jahowa, anggiat ganup ingananta, gabe habangsa ni Jahowa, inganan laho papatarhon hasangapon dohot hamuliaon ni Jahowa. Patoluhon, asa marsangap Jahowa di parngoluonta on, rade ma hita mangulahon partondion na mulak. Tagam, manat, jala rade laho mangarimangi diri. Molong dung dao marsirang sian Jahowa, magira ma muse mulak tu Ibana. (Bahan Sermon Penatua GKPI Air Bersih)